രാഷ്ട്രീയ ഇടവഴി; പരമ്പര, ഭാഗം-19. കാര്ട്ടൂണുകള് ചരിത്ര രചനയുടെ എഫ്.ഐ.ആര്. ആണെന്ന് പറയാറുണ്ട്. അഴിമുഖം ഡോട്ട് കോമില് പ്രസിദ്ധീകരിച്ചു വരുന്ന ചരിത്രം പറയുന്ന കാര്‍ട്ടൂണിന്‍റെ വിവരങ്ങളറിയാന്‍ മുകളില്‍ കാണുന്ന നീല നിറത്തിലുള്ള തലക്കെട്ടില്‍ ക്ലിക്ക് ചെയ്യുക. നിങ്ങള്‍ക്ക് അഴിമുഖത്തില്‍ പ്രസിദ്ധീകരിച്ച ലേഖനം വായിക്കാം.
രാഷ്ട്രീയ ഇടവഴി 19
സുധീര്‍ നാഥ്
മുന്‍തൂക്കം
ഒരാളുടെ ശക്തി കാണിക്കുന്നതിന് തൂക്കി നോക്കുന്ന ദ്യശ്യം ചിത്രീകരിക്കുന്ന പതിവ് കാര്‍ട്ടൂണിലുണ്ട്. ഈ പതിവ് ആദ്യ കാലത്ത് പല കാര്‍ട്ടൂണിസ്റ്റുകളും അവരുടെ കാര്‍ട്ടൂണുകളില്‍ വ്യാപകമായി ഉപയോഗിച്ചു വന്നിരുന്നു. കേരളത്തിലെ ഹൈന്ദവ ക്ഷേത്രങ്ങളില്‍ നടത്തി വരാറുള്ള ഒരു ചടങ്ങാണ് തുലാഭാരം. ഒരാളുടെ തൂക്കത്തിനു തുല്യമായി, ഏതെങ്കിലും ദ്രവ്യം, ക്ഷേത്രത്തിനു സമര്‍പ്പിക്കുന്നതിനെയാണ് തുലാഭാരമെന്നു പറയുന്നത്. പുരാണങ്ങളില്‍ പലയിടത്തും തുലാഭാരത്തെ പറ്റി പരാമര്‍ശിച്ചിട്ടുണ്ട്. അതില്‍ ഏറ്റവും പ്രസിദ്ധം ശ്രീകൃഷ്ണനു വേണ്ടി ഭാര്യ സത്യഭാമ നടത്തിയതായി പറയപ്പെടുന്നതാണ്.
കാര്‍ട്ടൂണിസ്റ്റ് റ്റോംസ് ബോബനും മോളിയും എന്ന കാര്‍ട്ടൂണിലൂടെയാണ് പ്രശസ്തന്‍. എന്നാല്‍ അദ്ദേഹം കുറേ രാഷ്ട്രീയ കാര്‍ട്ടൂണുകളും വരച്ചിട്ടുണ്ട്. അദ്ദേഹത്തിന്‍റെ ജേഷ്ഠന്‍ പീറ്ററില്‍ നിന്നാണ് രാഷ്ട്രീയ കാര്‍ട്ടൂണ്‍ വരയ്ക്കുവാനുള്ള താത്പര്യം ഉണ്ടായത്. പീറ്റര്‍ ആദ്യ കാലങ്ങളില്‍ രാഷ്ട്രീയ കാര്ട്ടൂണുകള് വരയ്ക്കുമായിരുന്നു. റ്റോംസ് മലയാള മനോരമയിലും, തൊഴിലാളി പത്രത്തിലും രാഷ്ട്രീയ കാര്‍ട്ടൂണ്‍ വരച്ചിരുന്നു. മലയാള മനോരമയില്‍ നിന്ന് പിരിഞ്ഞ ശേഷം സ്വന്തമായി തുടങ്ങിയ പ്രസിദ്ധീകരണങ്ങളിലും റ്റോംസ് രാഷ്ട്രീയ കാര്ട്ടൂണുകള് വരച്ചിട്ടുണ്ട്.
കോണ്‍ഗ്രസില്‍ എ ഗ്രൂപ്പും, ഐ ഗ്രൂപ്പും ശക്തമായ കാലത്ത് റ്റോംസ് വരച്ച ഒരു കാര്‍ട്ടൂണ്‍ തുലാഭാരവുമായി ബന്ധപ്പെട്ടതാണ്. കോണ്‍ഗ്രസ് രാഷ്ട്രീയ ചരിത്രത്തില്‍ എ ഗ്രൂപ്പും, ഐ ഗ്രൂപ്പും തമ്മിലുള്ള ബലാബലം മാറ്റി നിര്‍ത്താന്‍ സാധിക്കുന്നതല്ല. ഇരു വിഭാഗങ്ങളേയും പ്രതിനിധാനം ചെയ്യാന്‍ കെ. കരുണാകരനും, എ.കെ ആന്‍റണിയുമായിരുന്നു എന്നതും പകല്‍ പോലെ എല്ലാവര്‍ക്കും അറിവുള്ളതാണ്. എയും, ഐയും തുലാസിന്‍റെ രണ്ട് തട്ടില്‍. ഐ ഗ്രൂപ്പിന്‍റെ വശം കനം കൊണ്ട് താഴ്ന്ന് തന്നെ നില്‍ക്കുന്നു. അത് എന്തുകൊണ്ടെന്നത് റ്റോംസിന്‍റെ കാര്‍ട്ടൂണ്‍ കണ്ട് തന്നെ അറിയണം. കാര്‍ട്ടൂണിന്‍റെ നര്‍മ്മവും, വിമര്‍ശനവും അവിടെയാണ്.
കാര്‍ട്ടൂണ്‍ കടപ്പാട്: റ്റോംസ് കോമിക്സ്
No comments:
Post a Comment